Ihr liewe Leit:
Der Parre Richard Druckenbrod (geb. 1929) hot mol en PD Kallem
ghatt ass etliche Yaahr in re Ellenschteddel Zeiding gedruckt iss warre. Do
iss eens devun:
"Gott sie dand ass seller Sunndaag widder verbei iss! 'Weller
Sunndaag,' froogscht du? Ei seller Sunndaag am Ende vun Abrill wu mer die Uhr
ee Schtund an zwee Uhr marrigeds vorschiewe soll. Awwer waer der Deihenker
will uffbleiwe schunscht im Gang iss, dann schunn! Awwer die mennscht Zeit
dutt der Pitt die Uhre um Haus ee Schtund vorschiewe wu er ins Nescht geht.
"Awwer der neegscht Marrige kummt immer zu frieh! Eem sei Karreber will's
yuscht net uffeegne ass es schunnt Zeit iss fer uffschteh. Un's iss net yuscht
der Pitt ass der Druwwel hot. In der eende Gemee wu der Pitt gedient hot, hot
er sich immer druff verlosse kenne ass an dem Sunndaag der eent Mann aerscht
am Reikumme waar wu die annere Gemeesglieder am Heemgeh waare. Ich hab ihm als
die Hand gewwe un mir hen en bissel gelacht un noh iss er widder heemgange. Er
hot alleenich gelebt un ich denk nimmand hot ihn draagemaahnt fer die Uhr
vorschiewe.
"Die schtarricki Zeit waar lange Yaahre im Kessel am Koche vorderm
ass die Idee endlich ausbrowiert iss warre. Do in dem Land iss die Idee
aerscht recht rauskumme im zweede Weltgrieg fer Daageslicht zu schpaare. Der
Pitt kann sich noch gut errinnere wie die Landsleit unnich sich driwwer
gschwetzt hen. Sie hen immer behaabt ass des eens vum Deiwel sie Handwarrick
waar. Die Bauer hen gewisst ass-Grieg odder kens-die Kieh un die Hinkel ihre
Zeit net ennere! Un sie hen en groosses Gschiss driwwer ghatt."
Un sell gemaahnt der alt Professer an en Gedicht vum Isaac Summers
Stahr (1845-1930). Do iss en Vaerscht devun:
Die alt Uhr henkt datt an der Wand,
Ihr Gsicht iss mir gans gut bekannt,
Sie gnackt noch wie in frieh'rer Zeit,
Un saagt zum Mensch, "Halt dich bereit."
Gnick, gnack,
Gnick, gnack,
Vun Schtunn zu Schtunn eilt hie die Zeit,
Un draagt uns in die Ewichkeit.
Ya, 's iss warricklich kaam zu glaawe wie die
Zeit so schnell rumgeht.
Un ferwas denkt der Alt an die Zeit? Well, heit fangt der alt
Professer sei siwwezehede Yaahr aa mit seim Kallem "Es Neinuhr Schtick!"
Macht's gut,
Der Alt Professer
|
Dear people:
Pastor Richard Druckenbrod (b. 1929) once had a PG column for
several years that was printed in an Allentown newspaper. Here is one of
them:
"Thank God that that Sunday is once again gone by! 'Which Sunday,'
you ask? Why, that Sunday at the end of April when one is supposed to push
forward one hour at two in the morning. But who the devil wants to stay up
just to push the clock ahead! If something else is going on, then all
right! But most of the time Pit pushes the clock in his house one hour
ahead when he goes to bed.
"But the next morning comes always too early! One's body just does
not want to admit that it's already time to get up. And it's not only Pit
who has this trouble. In the one congregation where Pit used to serve, he
could always depend on it that on this Sunday this one fellow would first
be coming in when the other members of the congregation were going home. I
used to shake his hand and we laughed a little bit and then he went home
again. He lived alone and I think nobody reminded him to set the clock
ahead.
"Fast time was cooking in the kettle for long years before the idea
was finally tried out. Here in this country the idea first came out in the
Second World War to save daylight. Pit can still remember well country
folks talked about in among themselves. They always maintained that this
was one of the devil's caprices. The farmers knew that - war or no war -
the cows and the chickens don't change their time! And they had a big
to-do about it."
And that reminds the old Professor of a poem by Isaac Summers Stahr
(1845-1930). Here is a stanza of it:
The old clock hands there on the wall,
Its face is very familiar to me,
It ticks still as in an earlier time,
And says to people, "Keep yourself ready."
Tick, tock,
Tick, tock,
From hour to hour the time hurries on,
And carries us to eternity.
Yes, it is truly hardly to be believed how the time goes by so quickly.
And why does the Old Man think about the time? Well, today the old
Professor begins his 17th year with his column, "The Nine O'clock Piece
(Snack)!"
Take Care
The Old Professor
|
