Ihr liewe Leit:
Un saag mol, wie sett mer vun Schnecke un Schneckeheiser schreiwe?
Villeicht kummt die Antwatt druff aa, eb mer en Schreiwer iss odder in Dichder.
In seim Nadurbuch hot der Frank W. Matz mol gschriwwe:
"En Schneck iss wunnervoll erschaffe!Loss mich enwennich verzeehle.
Der Kopp iss an eem End un der Schwans am annere. Wann sie arrigets hie will,
puscht sie sich vaersich uff me schleimiche Weg ass sie sich selwer schmiert
wie sie geht. Mer kann der glitzeriche Schtreeme als sehne.
"En Schneck hot die Zeeh uff der Zung. Sie guckt ass wie een
Raschbel. Sie yuust sie ass wie en mann die Raschbel yuuse dutt. En Schneck
hot vier Fiehlhaerner: zwee devun sin lenger wie die annere. Uff yedem lange
Hann iss en Aag, awwer die Scientists saage sie kennde net gut sehne. Fer sell
yuuse sie ihre Haerner als en Fiehler. Sie kenne die Haerner in sich ziege
wann sie welle, un wann eens vun de Haerner abbrecht, dann wachst ball widder
en Hann un en Aag raus.
"En Schneck legt vun dreissich bis fuffzich Oier drei odder viermol
's Yaahr. Sie gleicht sie unnich en grosser Selaatschtock zu lege weil
Schnecke arrig gleiche Selaat zu esse. Wann die gleene Paerle. So wie sie ihre
haus greesser baue, duhne sie die vedderscht Dier weider naus pusche. Des Haus
waxt imme Zwaerwel; es yingscht Deel vum Haus iss der Middelschpitze.
"Des Haus iss gemacht vun Kallick un Schleim. Wann die Schneck sicher sei
will, dann schlubbt sie gans in ihre Schaal. Sie draagt ihre Haus immer uff em
Buckel. Sell iss hendich wann en Reggeschtarrem kummt!"
Un wie schreibt der Dichder vun denne Schnecke? Der Charles C. Ziegler
(1854-1930) antwatt sell Froog mit seim Gedicht "En Schneckehaus":
En Schneckehaus! Hoscht schumm bedracht
Wie wunnerschee es iss gemacht?
Es hot ken Fundament, ken Eck,
Es iss gebaut aus Schleim un Dreck,
Langsaam un net mit Angscht un Yacht.
Die Schneck iss wiescht un watt veracht,
Doch kann em Mensch sei Geischdesmacht
Ken Fehler finne un ken Fleck
In Schneckehaus.
So dutt der dichder, langsaam, sacht-
Wann er aa viel watt ausgelacht-
Gedrei sich halde an seim Zweck
Un aus Gedanke-schleim, wie'n Schneck,
Baut endlich sei Gedicht, voll Bracht
Wie'n Schneckehaus.
Macht's gut,
Der Alt Professer
|
Dear people:
And tell me, how should one write about snails and snail shells?
Perhaps the answer depends on whether you are a writer or a poet. In his
Book of Nature Frank W. Matz once wrote:
"A snail is created wonderfully! Let me tell you about it a little.
The head is at one end and the tail at the other. If it wants to go
someplace, it pushes itself forewards on a slimey path that it smears for
itself as it goes. Once can sometimes see that glistening streak.
"A snail has its teeth on its tongue. It looks like a rasp. It uses
it just like a man uses a rasp. A snail has four feelers; two of them are
longer that the others. On each long feeler is an eye, but the scientists
say that they cannot see well. Because of that they use their "horns" as
feelers. They can pull in their horns if they wish, and if one horn breaks
off, then soon another horn and eye grow out.
"A snail lays from 30 to 50 eggs three or four times a year. It likes to
lay them under a big lettuce plant because snails like very much to eat
lettuce. When the little snails are born, they look like very small
pearls. When they build their houses larger, they push the front door
farther out. The house grows in a spiral; the youngest part of the house
is the middle point.
"The house is made of lime and slime. If the snail wants to be
quite safe,it slips into its shell. It carries its house always on its
back. That is handy when a rainstorm comes!"
And how does a poet write about those snails? Charles C. Ziegler
(1854-1930) answers that question with his poem "A Snail Shell":
A snail shell! Have you observed
How wonderfully it is made?
It has no foundation, no corner,
It is built of slime and dirt,
Slowly, and not with fear or commotion.
The snail is ugly and is despised,
Yet a human's power of mind
Can find no mistake and no stain
In a snail's shell.
Thus does the poet, slowly, quietly-
Even if he is often laughed at-
Keep faithfully to his purpose,
And out of thought - slime, like a snail,
Finally builds his poem, full of splendor
Like a snail shell.
Take care,
The Old Professor
|
